مين انا ؟
اسمي EbNCaNa – ابن قانا بالعربي … عمري 18 سنة من قرية كفركنا بصف 12 يعني ثانوية عامة او توجيهي بلغة الاردن والضفة وغزة تخصصي الدراسي بيولوجيا كيميا يعني 5 وحدات لكل موضوع وطبعا بالكيميا بعرفش غير شوية من موضوع “مبنى وترابط” وهاض اسهل موضوع بالخمس وحدات اما باقي المواضيع بالكيميا ” مصيّف ” فيها … بخصوص البيولوجيا مدبّر حالي يعني وماشية الامور تمام والاستاذ كمال عواودة الله يرضى علي بعلمنا وبهلك وهو يشرحلنا وان شاء الله ما بتضيع جهودو سدا .
المهم اتركونا اسا من سيرة المدرسة ما بجي من وراها غير خراب البيوت … شوي صعب احكي عن حالي وعن صفاتي يعني بس بحاول قدر المستطاع … انا شوي دوونجي بحب المزح يعني مع انو ببيّنش علي بكثير مرات … يعني بلاحظ هالشي بس اقرب المقربين الي مثل رفيق الدرب همام خمايسي انا ويا بنفس الصف من صف البستان … بعدين بحكيلكوا عنو هاظ همام … المهم يعني بس هو بلاحظ علي المزح وكمان في غيرو مثل هيثم (ابو السعيد) و محمد (ابو العابدة) و قتيبة (ابو الناجي) … يعني اي انسان بجي بشوفني من بعيد بقول ولااااي الله يستر منو هاظ شكلو صحاب كثير هو والمشاكل .. يعني شو بدنا نعمل عادة كثير ناس بحكموا من المظهر الخارجي كبداية وانا ما بلومهن لاني انا مرات بكون منهن !!
بالحقيقة انا ما بحب المشاكل بالمرة والقوة مش بالعضلات ولا بالجسم الحلو ولا الشاطر الي بضل طالع نازل عند “صالح الكيري” عشان يبني جسم … انا اكيد مش ضد الرياضة وكمال الاجسام والشكل الحلو لكن بنفس الوقت مش حلو نخليها شغلنا الشغال ليل نهار لانو بالاخر القوي الحقيقي هو الي بقدر يضرب لكن بترفع عن هاللغة وبسامح ومش الي بسير يقول ” اتركوني علي … ولكوا اتركوني بدي افجمو !! ” وبس يتركوا بسير يقول والله انا وهالشب صحاب من زمان … وبروح قال بسئلو بتعرف فلان الفلاني … قال يعني عشان يلاقي معو قاسم مشترك وما يطبّو كتلة !!
المهم انا من كثر ما عندي حكي … قاعد بطلع مرات عن السياق بهالموضوع نفسو !! عكل حال مش مهم نرجع لموضوعنا … بالعربي انا بحبش المشاكل وكثير مرات اهبل .. او بعمل حالي اهبل “لغاية في نفس يعقوب” … هواياتي الرئيسية هي الحاسوب او الكمبيوتر او المحشيف للّي بحبو اليهود … من صف اول تقريبا وانا عندي كمبيوتر وطبعا بالزمنات ما كنش في كثير كمبيوترات كان بكل البلد يمكن 20 كمبيوتر كنت العب على لعبة Dave لكن يومها اول ناس عربوا اسمها بالبلد هني 2 … اخوي معاذ وحاتم الزكي قال سموها “ابراهيم المغامر” … كيف هيك سمّوها وليش … الله اعلم !!
ضليت تقريبا اخبص بالكمبيوتر لحد صف سادس … والتخبيص عندي طبعا هو استعمال الجهاز بدون اي فائدة والي بقول انو اللعب فائدة موافق معو بس احنا العرب كلشي عنا زايد عن حدو ومن هون بصل لاستنتاج انو حتى اللعب على الكمبيوتر عنا هو تخبيص “الا من رحم ربي” … بعد صف سادس فات الانترنت عنا على الدار وكان هجنة الانترنت يومها يعني الي عندو انترنت بكون “ابو زيد خالو” … مين ابو زيد وكيف صار خالو بعرفش والله بس بسمع هالمقولة مرات من الختيرية وبعرف انو معناها ايجابي بدل على التميّز … اسا بخصوص الانترنت قصدي مش انو طقطق وفوتنا وجبنالو قهوة وشراب وفواكه لا … قصدي يعني ركبنا انترنت … يعني بس عشان ما حدا يقول خربطنا نبلّش !!
المهم بعد صف سادس صرت اهتم اكثر بالانترنت وعالم التقنيات والبرمجة وتطوير الشبكات ومواقع الانترنت … قرتت بعدها اني احط هدف قدامي وهو انو ابني موقع خاص فيي على الانترنت والتحدي بالموضوع كان انو الموقع كامل يكون من تصميمي وبنائي الخاص ومش مثل ما بعملوا كثار اليوم بجيبوا قوالب جاهزة وبعدلوها وبس يخلصوا بكتبوا من تحت ” برمجة وتصميم فلان الفلاني ” وهو ابعد ما يكون عن البرمجة والتصميم واقرب ما يكون للنصب والروشم الكذاب وثقافة ” النسخ لصق ” … المهم حطيت الهدف قدامي وبعدين مسكت ورقة ” كعادتي” قبل اي مشروع اني بكتب الخطة على ورقة وبدرسها من كل الجهات وبحاول اعدل واخطط لكل شي قبل ما اباشر بالشغل عشان لما ابلش يكون كلشي واضح ومعروف سلف .
بلشت ببناء الموقع شوي شوي وكان طبعا الموقع كلو html يعني مش موقع ديناميكي … والفرق للي ما بعرف انو الموقع الديناميكي او التفاعلي هو الموقع الي بكون فيو تحكم كامل من قبل مدير موقع بواسطة لوحة تحكم وبدون لمس اي كود داخل اي صفحة من صفحات الموقع … اما الموقع الغير ديناميكي فهو موقع بسيط بالبناء وكل ما بدو يعدل علي المدير مجبور يفتح ” الكود ” تبع الصفحة الي بدو يعدل فيها ويرد يرفعها على السيرفر ” الخادم ” … يعني شغلة بتطلع الروح … بس مع كل هيك كان تصميم الموقع ثوري وحلو كثير وانا شعرت اني عملت انجاز كبير يومها … سميت الموقع ” شبكة ابن قانا ” وكان يفوت علي زوار كثار الحمد لله وكان فيو منتدى حواري وكان هاض اول انجاز تقني لألي … فكرة هالموقع بلشت مع بداية صف تاسع ويومها حكيت مع كم شب عشان نحط نواة الشبكة ومنهن مجد دهامشة ومجد ابو خلف ومحمد حاتم دهامشة وكمال امارة … وبالفعل هالشباب ما قصروا بالمرة وخاصة مجد دهامشة الي كان المسؤول الثاني عن الشبكة .
بعد فترة من النهوض والازهار للموقع شفت انو بوخذ كثير من وقتي وجهدي وبلشت ادور على اسهل طرق لعمل الموقع تفاعلي ويومها ما كنت اعرف شو يعني موقع ديناميكي او شو يعني لغة php وبعد بحث وتدقيق واسئلة بمواقع اجنبية وعربية عرفت اني لازم ابلش اتقن لغة البرمجة php وهي اكثر لغات البرمجة انتشارا بشبكة الانترنت والله بالفعل بلشت انزل كتب بالانترنت عشان ادرس هاللغة وكان من الكتب كتب عربية وكتب بالانجليزي لكن اكثر كتاب ساعدني هو كتاب الاستاذ “صقر العنزي” وهو اخ سعودي مبرمج php شرح بالكتابة مباديء هاللغة بشكل مبسط وسلس وواضح جدا … والحمد لله بس 6 اشهر بالزبط كنت قادر اني اعدل اي كود برمجي او ابرمج اي اضافة لمنتدى او سكربت … وبعد كمان كم شهر كنت اقدر ابرمج موقع ديناميكي من الصفر والحمد لله … واسا بقدر ابني اي برنامج كامل على الانترنت مع ميزات قوية وعالمية وغاية في الامن .
وحاليا بهالوقت بحضر لـ 4 مواقع عملاقة واحد منها رح يكون بنفس المستوى تبع ynet و themarker (مواقع عملاقة بالدولة) وان شاء الله بعد ما اخلص امتحانات البجروت رح اقعد سنة واشتغل على هالمواقع بجدية كبيرة ورح اطلعها باقوى مستوى مطلوب خاصة واني رح استعمل احدث التقنيات بمجال برمجة وتطوير مواقع الانترنت مثل Ajax و Ruby وActionScript .
انا مشترك بكثير مواقع ومنتديات عربية وبكتب مقالات تقنية باكثر من موقع لكن ابرزها موقع المشروع ” مجتمع مطوري المواقع العربية ” وكمان منتديات سوالف سوفت اكبر منتدى تقني عربي خاص تقريبا بمدراء المواقع والمطورين والمبرمجين العرب … مرات بحب انزّل افلام اجنبية واحضرها ومنتديات الصايرة افضل منتديات لتنزيل هذه الافلام بجودة عالية .
بخصوص فلسفتي بالحياة وآرائي الخاصة بكثير مواضيع رح اكتبها بشكل دوري على شكل مقالات هون بهالمدونة وان شاء الله نستفيد من خبرات بعض وتشاركونا بآرائكوا وتعليقاتكوا …
باحترام : EbNCaNa
في البداية انت عنجد خربطت اتبلش
بس بعدها زبطتا شوي .. واحييك على اسلوبك الحلو في الكتابة . خليتني اقرا كل الصفحة كلمة كلمة . لعبة ديف بعرفها من صف البستان .. تخريب كمبيوترات لحد صف سادس سابع .. وبعدها بناء مواقع واكثر اهتمام في ما يخص الشبكة ..وسبحان الله بتقدر تقول انو احنا على نفس الخط !
majdy123 – labagrut.net
مجدي
مايو 30, 2008 في 3:57 م
اهلين عمو مجدي والله كسرت وحشتي بهالمدونة عشان ما حدا بفوت كثير يعني … تسلم على اطرائك بخصوص اسلوبي الكتابة والحمد لله اجا هيك الاسلوب عشان اسهل الفهم واقرب اكثر لعقل القاريء … ان شاء الله بتشاركنا دايما في المدونة واذا بتحب تشترك معي بالكتابة كمان اهلا وسهلا فيك ..
EbNCaNa
مايو 30, 2008 في 4:50 م
هههههه اخ ابن قانا .. بكل معنى الكلمة .. انت روعه والله وحابب اقابلك شخصيا
موفق اخي والله يعطيك الف عافيه وينجحك بالحياة
اخوك ضوء القمر
يونيو 2, 2008 في 12:07 م
تسلم حبيبي قلبي يا ظو اللمبة ان شاء الله ما بنطفى ظوّك وتضل مشعشع في اركان المدونة والمنتديات ( منتديات لبجروت ) … وانا صراحة بحب ضو القمر كثير خاصة لما يكون بنص الشهر … اخخخ فتحتلي جروحاتي
.
مزحة
شكرا على تعقيبك الحلو والى الامام .
EbNCaNa
يونيو 2, 2008 في 1:08 م
اه ابراهيم المغامر..واصلي ام الفحم هاي الكلمة..مش اكيد انو انتو الفتوها يا דוד
فحماوي
يونيو 25, 2008 في 5:00 م
اهلين דוד وكلو واحد واسم وين … مش رح نختلف مين الفها … المهم انها لعبة حلوة واول ما بلشنا بلشنا فيها .
شكرا على مرورك الجميل .
EbNCaNa
يونيو 25, 2008 في 11:37 م
السلام عليكم ورحمة الله وبركاته,,
حياكَ الله اخي “ابن قانا”,
تصفحت مدونتك,,قرأت همسات من صفحة واخرى .
اهنئك…بداية موفقه ان شاء الله …
وفقكم الله..
*islamonline*
اغسطس 7, 2008 في 11:13 ص
هلا وغلا اختي وشرف كبير لي زيارتك للمدونة ومشاركتك الجميلة …
نتمنى مشاركتنا دائما والى الامام
EbNCaNa
اغسطس 7, 2008 في 11:25 ص
خخخخخخخخخخخخخخخخخخخخخخ
حلو والله اول مرة بقراها
جاري اختراق الموقع ^^ <<<< بمزح
اي شي دود دقلي على المسنجر
سلام
bilal
سبتمبر 26, 2008 في 5:49 م
اهلين بلبل … محلاك وانتي مقرّب .. بس اهلا وسهلا فيك دايما .
EbNCaNa
سبتمبر 26, 2008 في 11:59 م
ههههههههه
بجد إنت شخصيه رائعه
أول ما جذبنى لك هو ذكاؤك البرمجى وتفوقك فىتطوير الويب (ما شاء الله عليك)
لكن واضح كمان انك شخصيه ظريفه جداً وحبوب وليك نظره واضحه رائعه لمستقبلك اهنيك عليها
أكتر حاجه إستغربتلها سنك .. ما شاء الله عليك سبقتنا بدرى
بجد سعدت لزيارتى مدونتك ولقراءة هذه الصفحه الجميله وأتمنالك كل الخير والإزدهار ان شاء الله
عاشق الصداقه
نوفمبر 12, 2008 في 7:42 ص
لا فض فوك عزيزي عاشق الصداقة وبالفعل فان كلامك كان روعة واطرائك الجميل يدل على تقدير لما اقوم به وهذا بحد ذاته محفز قوي لي للمضي قدما في هذا العمل وهذه الرسالة … بخصوص سني فانا صراحة اعتبر حالي متأخر ولو بدت من سن ابكر لكسبت الوقت والخبرة الاكبر … شكرا على زيارتك الرائعة واتمنى ان تتكرر دائما .
EbNCaNa
نوفمبر 13, 2008 في 6:01 م
السلام عليكم
أضحك الله سنك أخي الكريم
حياك الله وبياك في عالم التدوين إن كنتَ جديدًا !!
فهذه المرة الأولى التي أرى بها المدونة ، فاعذرني إن كانت قديمة ..
تقبل مروري الخفيف ..
أختك في الله
أفنان
السلام عليكم
هَمسُ الرُوح
نوفمبر 13, 2008 في 7:56 م
Hhhhhhhhhhhhhhhh wlk ana knt al3b Dive wna s3′eeeree wkan ebn 5altw yeje ygole ebrahem lm3′amer Hhhhhhhhhhhhhhhhh
sheeshoo
نوفمبر 20, 2008 في 6:39 م
shala ente ebncana blmntda
ana knt ayam lmntda kan esme 50 cent 
…
sheeshoo
نوفمبر 20, 2008 في 10:08 م
شكرا خيتا افنان على مرورك الجميل …
50 اغورة اهلين فيكي … مزبوط انا نفسو هضاك ابن قانا , شكرا على المرور .
EbNCaNa
نوفمبر 20, 2008 في 10:28 م
السلام عليكم ..
بمحض الصدفة وصلت الى هنا .. جذبني موضوع موقع بانيت .. الموضوع الذي اوافقك عليه 100%
ملاحظة : ارجو ان تكون كتاباتك في الفصحة.. فهذا افضل وارقى
والسلام عليكم
هبة رمزي
ديسمبر 15, 2008 في 1:04 ص
بعكسي
انا بحب الكتابة العامية فهي تقرب الكاتب للقارئ اكثر 
امممممم .. اه لو سمحت اخي جبت موقع حلو ممكن تحط التوب تن بالمدونة
تفضل عدل وانشر :]
http://dvice.com/archives/2008/12/top_10_bush_sho.php
SheeShoo
يناير 5, 2009 في 2:51 م
يا زلما ماشاء الله عليك واحد واعي وفهمان
انا من اول حابب اتعرف عليك لما شفتلك كم موضوع في منتدى سوالف قررت اضيفك على الماسنجر ومشيت الايام ونسيت …
واليوم وانا عمببحث في دالة fsockopen طلعلي موضوعك “الطريقة الاحترافية لايصال الرسائل الى الـ Inbox دائما بواسطة Smtp …” مع انوا ما دخلوا في الدالة دخلت عليه
وأنا عبقرأ الموضوع كنت انت كاتب مثال عن ميكروسفت وذكرت فيه اسمك فتذكرتك ..
وقلت هل مره لازم اتعرف عليك
انا ما ذكرتلك ليش اناحابب اتعرف عليك بس حقلك ليش :
اولا نت في نفس عمري ونفس المرحة الدراسي
وثانيا شكلك فهمان في php وانا بعرف php ومالي ملاقي حدا يفهملا بقد عمري
وقت قرات هادا الموضوع لا قيت شغلات تانية متشابهة بيناتنا
في شغله بدي اقلك عليها
ياريت تقلل الكلام الاردني لاني ما عبفهمه او انك تكتب تفسيره
وكمان انا بقول انوا عندك زملاء كتير بس اصدقائك الحقيقين قليل هيك حسيت
يلا بكمل كلام بس تضيفيني على الماسنجر
سلام
m.z.r
مارس 5, 2009 في 3:50 م
ابتسامة تلوح …
رائع !
تسنيم
أبريل 7, 2009 في 8:43 م
أحييك
فراشة حزيران
أبريل 9, 2009 في 5:43 م
EbNCaNa = (‘عقل كبير+عمر صغير+ظريف+ذكي’);
اتنبأ لك بمستقبل واعد في المجال البرمجي والتطويري على الويب ..
اتطلع لأرى اعمالك المستقبلية وخصوصاً في دعم البرمجيات العربية
دمت بخير
مشراق
مايو 9, 2009 في 4:06 ص
انت إنسان رائع واسلوبك في الكلام وإبداعك في التحرير اكبر من عمرك وهذا دليل على مهاتك الجميلة التي ستفيد البشرة بإذت الخالق سبحانه وتعالى
دحمي
يوليو 16, 2009 في 12:59 ص
حبيب قلبي ابن قانا انا لغايه بدايه رمضان ماكنت شوفت المدونه بس بياكد انك شاب زكي وواعي ومثقف وربنا يكرمك بالمزيد
ميكا
mohmed_meeka
اغسطس 28, 2009 في 9:24 ص
بجد يا ابن قانا أنت شخص أكثر من رائع بارك الله فيك وزادك من علمه وجعلك من كبار مبرمجى العرب إلى الامام دائماً وأنتظر منك مشاركنك معى في بناء موقع بأذن الله يكون له أثر في المجتمع العربى والعالمى
أحمد عبدالمجيد
أكتوبر 17, 2009 في 6:46 ص