EbNCaNa

بنفوت على منتدى لبجروت مثلا … على قسم التاريخ على سبيل المثال لا الحصر … بتلاقي شي 20 موضوع ورا بعض … واحد بكون عنوانو ” منشان الله كمان اسبوع بجروت التاريخ وبدي تلخيص كذا كذا ” وموضوع ثاني عنوانو ” يا جماعة الخير ابوي بالمستشفى وامي عندو وبدي تلخيص تاريخ اليهود ” وكمان موضوع عنوانو ” طنيب على ولاياكوا تجيبولي حل بجروت صيف 2007 ” .

كلها هاي امثلة وبنيجي لواحد واحد … اول مثال بدو تلخيص مادة كذا وكذا … طيب يا خيا او خيتا … صعب عليك تروح تعمل عملية بحث صغيرة بالمنتدى وتفحص اذا طلعلك نتائج ؟؟؟ واذا لا جرب روح على جوجل او اي محرك بحث ثاني وبحبش على مواد عن الموضوع الي بدك يا واذا ما لقيت بمحركات البحث روح على ابن او بنت صفك جيب دفترو وانسخ المادة الي بدك ياها … واذا لا سمح الله صارت صدفة ومات كل ولاد صفك روح على ولاد الصف الي جنبك … مزحة مش تسدقوا … اذا صارت ظروف قاهرة وما قدرت تجيب المادة من حدا … ساعتها فوت على المنتدى واطلب مواد .

المثال الثاني : ابو الشباب امو بالمستشفى الله يشفى ويقوم بالسلامة … قولوا آمين … وامو عند ابو عشان اذا احتاجها تكون جنبو … والشب علي بجروت … عمرو 18 سنة … بجيل 18 سنة عند اليهود بفوتوا على الجيش وبمسكوا بواريد وبوقفوا على الحدود مع دول معادية وبدافعوا عن دولتهن بكل قوتهن … واحنا ابن هال18 الي عنا بقدرش وبعرفش يدرس للبجروت والماما والبابا مش حدو لانو بعرفش يركز بالدروس اذا ما عملتلو الماما ” ننّا ” وولا بعرف يركز اذا البابا ما اخدو “باي” … يعني دلال في دلال … والغريب اني مش عارف شو الكيشر بين امو وابو وبين مادة البجروت !!؟؟

المثال الثالث : الاخ بهالمثال قاعد بطنّب على الاعضاء … تقولو في عضو مات بالمنتدى لا سمح الله وهالعضو قريب منو … وقاعد بطنّب عليهن الي عندو دين برقبت الي مات يجي … ورقبتي سدادة … سدادة يعني بتسد … مش غطا قنية كولا مثلا .. للتوضيح فقط … طب يا حبيبي لويش قاعد تقول هيك … بنفعش تقول الي بدك يا دغري ؟؟ لازم طنيب ومش عارف شو !! ؟ اما عالم … ( قال يعني مفكر حالي احسن من الناس ) لو تسمعني ستي بقول هيك بتسير تقول ( هرّي هرّي والعشا خبّيزة … وبتقول طز … طزين .. 3 ) … الله يرحمها قولوا امين .

المهم يا جماعة بلاكوا من طولة السيرة ( قال بعد ما نشّفت حلوقهن وانا احكي ) … المهم انو نعرف وينتا نكتب موضوع ونتأكد من المادة اذا موجودة بواسطة خاصية البحث … والاهم من كل هالامور انو احنا نكتب مواضيع واحنا نبادر لكتابة الحلول مثلا ونكتبها بمهارتنا ونتعب عليها مش كلها منقولة … مثلا اليوم كان بجروت عبراني … بنروح بنفوّت نموذج الحل على السكانر وبنزلو على المنتدى عشان الكل يستفيد … متأكد من حلك ؟؟ بتروح تحطو بملف وررد وبترفعو على النت وبتحطو بموضوع عشان الكل يستفيد … ما تضل تستنى يجيك الاكل جاهز لا … روح ولّع النار وحمّي الزيت وخلي الزيت ” يطزعك ” … ايوا توجع وثابر وروح جيب ملح وفلقل واسوي الطبخة او الاكلة … الي هو … المقصود انك تتعب .. وما تضلك تقول .. يلا مهني كمان شوي بنزلو حل … او بكرا بنزلوا تلخيص … اذا كل واحد بدو يركن على الثاني مش رح نتطور … ويخلف عليهن المثابرين الي بجيبولنا حلول … تخيلوا لو كل واحد بحكي زيي وزيك ؟؟ تخيل لو الكل قليلين خواص ؟؟ شو بسير بالمنتدى ؟؟ بعود الو قيمة ؟؟ اعتقد انك بتعرف الجواب …

القصة عنا انو حتى لو بنعرف الجواب احنا بضل مشكلة … لانو في شريحة من مجتمعنا اذا حكوا .. بتسمعش … واذا سمعت … بتفهمش … واذا فهمت … بتعملش !! عشان هيك احنا بدون نسمع ونفهم ونعمل … واذا كل واحد عمل هالشي وطبق هالامور بدورو … رح نصل فوووق بالعلالي … تذكرت زمان واحنا نلعب اذا غلبنا حدا بشي لعبة بنقولو … ” احنا بالعلالي وانتوا بسطل زبالي ” … وهني بس بكونوا ولاد ثنين … ليش بقول ” وانتوا ” يعني بستعمل صيغة الجمع لولد واحد قبالو … بعرفش صراحة !!

شكرا على حسن القراءة … وان شاء الله نشوفكوا بحلقة وموضوع ثاني .

سلامات