جدول الأعمال اليومي ومتعة إدارة الوقت …
مرحبا للجميع …
حابب احكيلكوا شوي عن ادارة الوقت … هالاشي فن ومتعة … انا كثير مرات بحب ابني جدول يومي لأعمالي … وسبب اعتمادي لهالاسلوب هو اني مرات من كثر ما بكون علي شغل وبراسي مليون شغلة بسير اشتت بافكاري واخربط … والاهم اني بالليل ما بعرف انام بضل افكر وشو بدي اعمل وهيك ممكن يكون احسن من هيك … وبتمشي ساعتين وثلاث بالليل وانا بس افكر وبالاخر ولشي بعمل من الي بفكر فيو لانها مجرد افكار نعسان !!
عشان هيك بحب امسك ورقة وقلم واكتب بكرا مثلا شو بدي اعمل .. بخطط لكم شغلة وبرقمهن … مرات من 5 شغلات بعمل 4 او 3 … مرات بتعقد الامور بعمل 2 او وحدة !! بس مرات لما اكون مخطط ل6 شغلات فرضا لثاني يوم … ونفذتهن كلهن وضل عندي وقت كثير بنبسط … بحس حالي زبطت وضعي ومشيت وقتي باكبر فائدة وبنفس الوقت بدون اهمال الجانبي اللامنهجي …
يعني اغلب جداول الاعمال الي بكتبها بتتعلق بشغلي بخصوص المواقع والبرمجة وهيك … يعني بدوش راسي مرات وبكنش الشي محوج … بس لما اكتب برنامج لثاني يوم على ورقة او بالمحشيف … عادة بحفظ الجدول على المحشيف لانو كل شغلي عالمحشيف … وكل ما اخلص شغلة بمحيها … وما بخليها بوجهي عشان احس اني عملت واشتغلت وما ضليت اتسلى …
هاي طريقة كثير مفيدة ومليح يتعود عليها الشخص لحياتو بالمستقبل عشان ما يعيش ” فوشطة ” … بعد ما عملت هالطريقة صرت انام احسن بالليل وما اخلي حالي افكر بهالامور الا اذا حضرت فلم رعب ليلتها بضل افكر فيو بعد ما يخلص 
… واسا بطلعلي من ورا الباب … او بدو ينطلي من الشباك … قال عشان مخفش او اضل افكر بالفلم بسير اغنّي :P .
ما بحب اعبي الجدول اليومي مجرد اعمال وشغل … بالعكس بكتب مثلا … الساعة 11 او 10 في فلم على mbc2 وبروح احضرو … مش كلشي شغل ومحشيف وهيك … مليح الواحد يرفه عن نفسو كمان … لاني مرات بحس راسي بدو ينفجر من كثر الشغل … حتى لو فش شغل بالمحشيف وطول الوقت لعب مش مليح كمان … حلو تطلع مشوار .. عالطبيعة .. عالبحر .. هيك تغير جو … بتجدد نشاطك وبترجع صاحب عزيمة اقوى .
هاض رأيي ونشاطي بخصوص طريقة ادارتي لوقتي الي بحب يعمل مثلي … سدقوني بنبسط .
سلامات .
