10 دروس وبدي Test !!
مرحبا يا جماعة الخير …
حابب نداون اليوم شوي معكوا عن شغلة دروس السواقة … يمكن القصة شوي مهمة لانها ما عادت تقتصر على الشباب بس … انما على الصبايا كمان … قبل كم سنة كنت بالصدفة تتشوف صبية بتسوق … اليوم مش بس بسوقوا … يا ريت اذا وقفت على هيك …
اليوم الصبية صارت لما توقف على رمزور … تشوف قبالها شب مثلا … بتسير تعطي المطور قوة ” تنعر” ما بفتح اخضر وهي الاخت بتسابق 
ولك يا حبيبتي انتي صبية ناعمة وامورة وحلاوتك بطبعك الهادي … صرتي بدك تقلدي الشباب بهالهبل ؟؟
عسيرة كلمة مطور … بسوريا بقولوا عن المطور سيجل .. ” موتسيك ” ههههه كلمة حلوة ها ؟؟ بقولوها كثير بالمسلسات السورية .. بس كلمة ” مطور سيجل ” احلا واقوى … ” موتسيك بتيجي نذلة شوي بالنسبة لدراجة ” نارية ” … مع انو بالاساس احنا كمان بنخبص لانو اصلها بالانجليزي ” موتور سايكل ” motorcycle .
طلعت شوي عن الموضوع سامحوني …
باجي انا اليوم وكمثال .. بروح عند استاذ السواقة الفلاني :
- انا : استاذ بيش الدرس ؟؟
- الاستاذ : مش رح نختلف مع المحترمين ( والاستاذ يمكن مش قادر يشوفني ووضعوا المادي كريتي عشان هيك بحكي حلو عشان يجذبني )
- انا : يعني بحوت ويوتير قدي ؟
- الاستاذ : خلص انتي تعال اول درس بنشوف كيف سواقتك وبنقرر اذا كبلنوت او كل درس بدرسو
- انا : ماشي استاذ ولا يهمك بس اي يوم الدرس ؟
- الاستاذ : ( بمسك اليومان وببلش يتصفح فيو تقول عندو 6000 طالب ومش عارف اي يوم بدو يحطني بالاخر بقلي اي يوم بدك ؟ !! )
- انا : بكرا استاذ ..
- الاستاذ : ماشي .. بجرا الساعة 5 المسا … سجور !!
هيك بالعادة بتبلش الاسئلة بين الطالب والاستاذ … بختلف الاشي عند الصبايا شوي بس مش كثير .. المشكلة الي بدي احكي عنها هي انو انا وانتي بدنا نتعلم 10 دروس وبعدين بنسير نعمل للاستاذ شرور بدنا نفوت تست … واحنا يمكن بعدنا مش عارفين نتحكم بالسيارة بالشكل الصحيح !!
طيب ليش هيك حبيبي … او حبيبتي خيتا … الشغلة ازود عند الصبايا لانو بطبعهن ضعاف بالسواقة بحكم ” انوثتهن ” … ( اسا بسدقوا حالهن الصبايا :P ) .. يعني شو المشكلة لو تعلمنا دروس … بنضل نتعلم لتنوا الاستاذ من حالوا يشوف انو لازم نفوت تست وبنقدر ومن حالوا بسجلنا … ليش بنستعجل ؟؟ يعني عشان تسير تسرق المفاتيح من ابوك الصبح وتروح بالسيارة عالمدرسة ؟؟ شوفوني يا ناس ؟؟ يا حبيبي الرخصة وسلية مش غاية … وركبت السيارة للضرورة مش للسيفوفيم بالبلد وصوت المعريخت عالاخير !!
انا بحكي عن نفسي بلشت اتعلم بدون ما اطلع على سيارة قبل … يعني ما سقت قبل … وهالشي بعطيني افضلية كوني ما عندي معلومات ممكن تكون مغلوطة او عادات سياقة مش مليحة … يعني فتت اتعلم وجاهز اعبي نفسي كلشي من المعلم بشكل مزبوط وقانوني .. بعد حوالي 40 درس شاف الاستاذ اني بقدر افوت تست بهالوقت وسجلني … وقبل هالـ 40 درس ما فتحت للاستاذ سيرة التست … شو المشكلة اضل اتعلم زيادة خبرة … الي بقول مصاري ومش مصاري … يا سيدي بهمش … السواقة فن وذوق ومهارة … الرسم فن … في ناس بروحوا يتعلموا دورات رسم … طيب اطلع من منطلق انو السواقة فن … واعتبر كل درس بتدفع علي مصاري انتي تعلمت فيو شي جديد … وصرت متمكن اكثر بالسواقة وصار عندم خبرة اكثر وصاحب اقدمية بالموضوع .
عكل حال بالاخر انا سقطت بأول تست وكمان كم يوم عندي التست الثاني وان شاء الله بزبط … طب لي بنستعجل كثير عالرخصة ؟ وبنجنن الاستاذ بدنا تست بدنا تست … وبس نفوت تست ونسقط … الحق ” عالبوحين ” وبالاخر بطلع البوحين كذاب بكلشي كتبوا بالتقرير … طيب كون صادق مع حالك … صح الوزارة بتشدد كثير حتى على ابسط غلطات … لكن من حقهن … هني مش مجانين يعطوا اي شخص رخصة بلا ما يكون متمكن 100% … الرخصة يعني تعطي لشخص كتلة حديد وزنها اقل شي 5 طن … تمشي فيها بالشارع بسرعة 100 كم / الساعة .
عارفين شو يعني هالشغلة … كيف بدكوا الوزارة تعطي رخصة لشخص معو اداة قتل من الدرجة الاولى !! ؟ السيارة اذا ما كان صاحبها متمكن مليون بالمية ممنوع يمسكها ولا يوخذ رخصة … واذا عمل مخالفة لازم يدفعوا مصاري عشان يتعلم ما يعيدها … بتشوفوا كل يوم الحوادث والشباب الي بتروح بنص عمرها !! ليش ؟؟ السيارة بتنفعش ؟؟ ولا الشوفير دايخ ؟؟ او بحكي بالبلفون ؟؟ او يمكن سكران ؟؟ او مش حاطط حزام ؟؟ طيب ليش كلشي الحق عالدولة والوزارة وفي عنصرية ومش عارف شو !!
لا يعمي مفش من هالحكي بخصوص السواقة والرخصة والمخالفات … الشغلة فيها حياة ناس … ولما يسير لعب بالشارع الرئيسي وسرعة زيادة عن الحد لازم البوليس يضرب بأيد من حديد ولازم يكون توعية اكثر للشباب خاصة عشان ما يتهوّرا بالشوارع الخاصة والرئيسية .
بالاخر بوصيكوا اخواني وخواتي … ما تستعجل عالرخصة … لما بتكون جاهز الاستاذ لحالوا بقدمك تست وان شاء الله الكل بنجح وما تسرعوا عالطريق ما حدا وراك بعصا ..
نصيحة اخوية : الي بكون عندو تست مش يروح يعزّر عالدنيا !! لانو اذا سقط بدهن يعملوا ممسحة ويمسحوا فيها الارض … واذا نجح بدو يسير بنك ويضل يزق كنافة … يعني عالجهتين ماكلها … عشان هيك انضب واقعد — مزحة مش تسدقوا .
سلامات .
