EbNCaNa

مرحبا للجميع

اليوم حابب احكيلكوا عن شغلة مهمة كثير بحياة البني ادم … وهي الصحبة او الصداقة بين شخصين او مجموعة اشخاص بغض النظر عن الجنس يعني ممكن يكون الشخص ذكر او انثى … كثار منا ما بعرفوا الموازين الحقيقية للحكم من خلالها على نوعية الشخص الي معك … هل هو صديق وصاحب بهدف المودة والقرب والحب والاحترام … ولا انو مجرد شخص ” بقول ” انو صاحبك وانو صديقك وانو بحبك وبموت عليك بس حقيقة قربو الحقيقية منك هي المصلحة وبس … يعني لما يوخذ الي بدو يا منك شو بعمل ؟؟ اكيد بقدحلك .

اليوم العالم صار مادي اكثر … وعقل الانسان بتطور اكثر واكثر مع تطور التكنولوجيا والادراك الحسي من حول الانسان … وقصدي مثلا انو زمان الانسان القديم ما كان بحاجة انو يستعمل عقلو كثير كثير … كان ماكسموم يستعملو عشان يخطط لاصطياد غزال او بقرة او عصفور عشان يوكلو … بس مع الوقت تطور الانسان القديم وصنع شغلات جديدة والي بدورها خلتوا يشغل عقلو اكثر وبالتالي مستوى ذكائو صار اكبر وعشان هيك حجم جمجمة الانسان اليوم اكبر من حجم جمجمة الانسان القديم والسبب كيف حكيت هو نظرية التطور والتكيف مع البيئة المحيطة .

بعرف اني طلعت شوي عن الموضوع بس حكيت هالحكي عشان اوضح الفكرة قد ما بقدر … والي بدي اقولو بخصوص مادية العالم اليوم وفقدانو للجانب الروحي هو انو الانسان اليوم صار يقدر يمثّل اكثر على غيرو … ويحاول يظهر مرات بمظهر معين ولكنو بالحقيقة كذاب ومنافق مش اكثر .

كان حلمي من وانا صغير يكون الي صديق عمري … وعشان اقول عن شخص هاذ صديقي ورفيق دربي لازم تتوفر فيو صفات معينة ولازم يتصرف تصرفات معينة بتدل بشكل قاطع انو هاض صاحبي وحبيبي وصديقي لذات الصداقة والمودة ومش مصلحة خلوني اذكرلكوا بعض من هاي الصفات والتصرفات تحت عنوان ” مين هو صديقي الحقيقي ” .

1- هو الشخص الي دايما بوقف جنبي بكل مشاكلي وبكل افراحي واتراحي .

2- هو الشخص الي بحب الي بحبني وبكره الي بكرهني .

3- هو الشخص الي بدافع عني لما حدا يحاول يعتدي علي .

4- هو الشخص الي ما بستحي مني ولما اغلط بقلي بوجهي انت غلطت وما بتركني غير لما اصحح غلطي .

5- هو الشخص الي بتصل علي كل يوم يسأل عن حالي ويتطمن علي اذا كنت مريض او مسافر الخ …

6- هو الشخص الي بحاول يوفرلي السعادة والراحة كل الوقت حتى لو ضحى بوقتو عشاني .

7- هو الشخص الي بشاركني نفس الطموح ونفس طريقة التفكير وتقريبا نفس الصفات .

8- هو الشخص الي ما بثقل كلامو لدرجة انو يجرحني وما بمدحني كثير لدرجة النفاق .

9- هو الشخص الي بتذكر المعروف وما بنسى وما بنكرو حتى لو دار الزمان علينا .

10- هو الشخص الي بضل كاتم اسراري حتى لو زعلنا من بعض .

بعد ما ذكرت هاي الـ 10 نقاط والي بتميز الصديق الحقيقي خليني اخذ منها 3 نقاط واركز عليها وهي النقاط 2,4,5,9 … اكيد رح تسألوا ليش اخونا بدو يركز على هاي النقاط عن دون الباقيات … شو السبب ؟؟

السبب حبايبي انو شخص معين كنت افكرو صديقي ولكن قبل فترة قريبة تبين انو شخص ” مصلحجي ” ( مقرب مني للمصلحة فقط ) بعكس ما كنت افكر انو بحبني كثير وانو رح يضل معي وصاحبي حتى لو كبرنا وتجوزنا وصار عنا ولاد … بس مبين اني تماديت بالحلم … يمكن عشني بحاجة لصديق حقيقي حلمت كثير … وعادة لما يكون الشخص محروم من شي … بحلم فيو كثير وببني قصوووور من رمال البحر … بأي ثانية ممكن يجي عليها ميّ ويهد هالقصور .

الغريب انو هو كان بصفي من صف البستان لحد اسا … يعني من البستان لحد صف 12 وحتى من صف سابع لحد 12 واحنا جنب بعض على نفس الطاولة !! ما اصعبها تكتشف انو شخص حبك للمصلحة بعد كل هالعشرة والذكريات الحلوة على مدار 13 سنة تقريبا جد صعبة !! يمكن قسم منكوا بقول يا حرام جد قصتو بتشفق !! اول شي ما بحكيلكوا هالحكي عشان اشكيلكوا همي يعني … بس عشان انبهكوا لاني متأكد مليون % انو اغلب الي حوليكوا مش هني الصحاب الحقيقين الي بتتوفر فيهن الـ 10 نقاط الي حكيتهن وثاني عشان اوضحلكوا قضية مهمة جدا وهي …

مش بالضرورة كل شخص ما بتتوفر فيو هاي الصفات هو مصلحجي … ممكن يكون انسان عادي او شب عادي قريب منك بس ولا مرة شعر انو بحاجة لصداقة حقيقة وبالتالي فهو مش رح يحاول يطبق هاي الـ 10 نقاط تجاهك … رح يعتبرك صديق الو بس بدون ما يتعمق بمعاني الصداقة الجوهرية الي انا ذكرتها فوق وهالشي مش عيب ولا بتسمى نفاق او مصلحة وانما مجرد جهل او نقص بالوعي الاجتماعي عند هاض الانسان والي مجبورين اهلوا يرفعوا عندو هيك نوع من الوعي .

حكيتلكوا رح اركز على 3 نقاط من الي حكيتهن فوق ورح ابلش اسا اركز على وحدة وحدة واشرح سبب تركيزي عليها :

النقطة 2 : هالشخص الي خيّب املي وعدني انو يعادي الي بعاديني … لكن لما اجا شخص ثاني حاول يخرب اسمي بالمدرسة ما لقيت من ” صاحبي ” ولا هو طالع معو مشوار بعد بكم جمعة من الي صار … طيب انت وعدتني وحتى لو ما وعدتني انت من حالك لازم تعرف انو عدو صاحبك عدوك … ومن هاي الشغلة شفت اول علامة لكونو كذاب وقربو مني مصلحة مش اكثر .

النقطة 4 : الشخص الي خيّب املي كان دايما يحترمني ويقدرني وحتى مرات يستحي مني لما بدو يحكي كلمات مش بمحلها او مصطلحات بذيئة وكان يسكت وما يحكيها قدامي … لكن انا اخر فترة تطاولت بلساني وصرت مرات احكي كلمات متناقضة مع مبادئي وطريقة حياتي وتربيتي … وبهاي الفترة ولا مرة قلي يا ابن قانا انت غلطان … انت ما كنت هيك … وانت ممنوع تحكي هيك … ولا مرة نصحني وانتقدني وقلي ممنوع بحزم وبشدة … وهاي العلامة الثانية انو ما بهتملي وانو قربو مني مصلحة مش اكثر .

النقطة 5 : الشخص الي خيّب ظني اتصل فيي قبل كم يوم … لما اتصل كنت مبسوط كثير انو تذكرني وقلي كيف حالك شو الاخبار وقلي متأسف عشني ما اتصلت فيك من قبل اسبوعين عشان اقلك الحمد لله على سلامتك عشنك كنت مريض … كنت قبل اسبوعين بالمستشفى وما تذكرني غير اليوم … ولونو بس هيك مش مشكلة ما بعتب علي بس وينتا بعتب ؟؟ بعتب علي لما يتصل ويعمل حالو حبيبي وكيف حالك والحمد لله على السلامة … بآخر السيحا بقلي بدي منك طلب … وطلب مني شي تبين انو سبب اتصالو هو الطلب مش اكثر … وبس اتصل وعمل حالو صاحبي عشان يضحك علي لكن بالاخر كشف حالو وتبين انو التلفون كمان صار تلفون مصلحة ويومها تأكدت اكثر واكثر انو قربو من مصلحة مش اكثر .

النقطة 9 : الشخص الي خيّب املي كان بفترة من الفترات بحاجة لشغلة كثير ضرورية الو وحتى ضرورية لكل انسان … بس شفت انو بحاجة لهيك شي عطول وفرتلو ياها وبأعلى جودة ممكن يتصورها … يعني بعمرو ما كان يحلم انو رح يكون بين ايدي هيك شي وبهيك جودة … لما شعرت انو بحاجة الها منحتو ياها بكل سرور … بس بعد فترة لما صرت اسئلو عن وضعو وحالو بعد ما وفرتلو هيك شي … صار ينكر هالشي … وما يحب أسئلو .. صار يتطاول علي ويفكر حالو احسن مني … ونسي انو كان بأمس الحاجة لهيك شي ونسي انو انا اعطيتو يا … وصار يشوفني بنظرة استعلاء … كاني انا بعرفش اشي … وهو السوبرمان الي قدر يحصلو بنفسو … انا ممنوع احكي هالحكي لانو عيب … لانو ممنوع احكي للناس شو عملت شغلات مليحة مع غيري … ممنوع اقلو هالحكي لانو ما بدي يفكر اني محملو جميلة او اني ” هاتت ” علي … انا بس بعطي هالمثال عشان اوضح فكرة عدم نسيان المعروف وعدم نكران الجميل .

انا مبسوط الي قدرت اعبر عن نفسي بهيك موضوع … وكمان مبسوط لاني من النوع القابل للتكيّف مع اي بيئة اجتماعية … يعني عرفت انو ” صاحبي ” هو بالحقيقة مجرد منافق او انو انسان بسيط ما بعرف روح الصداقة الحقيقة وشو يعني العشرة والحب والتآخي … يبدو هيك مفاهيم ما قري عنها وولا مرة حدا شرحلو ياها … بعد ما عرفت هالشي مش رح اسير ابكي على الي صار … عادي بكمل حياتي وبحاول اعيش مع الوضع الجديد كيف بحكوا الاجانب keep going والترجمة الحرفية الها ” خليك ماشي ” اما الترجمة اللغوية هي ” ما تندم على الي صار وكمل حياتك “.

 

واخيرا وصيتي الكوا شباب وصبايا … اعرفوا من صحابكوا الحقيقين … وولا مرة تحكم على شخص انو صديقك المخلص والوفي قبل ما تتأكد 100% ومن خلال قصتي المفروض تعرفوا انو اي شخص ممكن يضحك عليك ويوهمك انو صاحبك لمدة 12 سنة !! ما تفكروا انو سنة او سنتين او 3 او اكثر بتكفي عشان تعرف مين صاحبك الحقيقي ومين صاحب المصلحة .

 

سلامات حبايبي .

 

اخوكم المحب : EbNCaNa