مرحبا شباب صبايا كيف حالكوا شو الاخبار ان شاء الله مبسوطين ومكيّفين ؟ بتمنى تكونوا هيك واحسن , اليوم بدي اكمل الموضوع الي بلشت فيو عن يوميات طالب بساحة المدرسة , وللي حابين يقروا الجزء الاول يتفضلوا يدخلوا هون , واسا رح نكمل بكمان 3 نقاط والي رح نعدها سبب من اسباب كون المدرسة عالم ثاني مختلف جدا عن بيئة البلد الطبيعية .

ملاحظة : النقطة الاولى والثانية موجودين بالجزء الاول للموضوع .

3- الحكي الحلو الي صار دارج على لسان شباب , ودخل لقواميس الصبايا كمان , بتمشي بساحة المدرسة , ما بتحس ولا كوام من الكلمات الحلوة بتنزل بذينك , ويا ريت هيك كلمات تكون محترمة او مؤدبة , لا لا , انا قصدي بالكلام الحلو عن الكلام الزفر , بتلاقي ابسط كلمة واهون كلمة بقولها الشب لصاحبو , … امك , ساعتها برد علي صاحبو بنفس الكلمة , وعااادي جدا كانهن بقولوا لبعض صباح الخير , لكن يا ويلوا صاحبوا اذا حكالو … اختك , قال ساعتها بثور الشب وبزعل , وانو هيك كلام عيب وكذا , يعني اخونا بعتبر انو اختو الها عرض وشرف وكرامة , اما امو بهمش قال !! شايفين وين وصلنا ؟ مش قمة المسخرة هاي ؟ طب وين الغيرة ؟ ما بتغار على امك ؟ على اختك ؟ انتي لما تقبل المسبة على امك وتردها بنفس المسبة على امو انت بتكون ديوث , والديوث ما بشم ريحة الجنة , بس بضل يشم ريحة الباربكيو بلحم البني ادمين بجهنم !!

يا جماعة الخير القصة ما وصلت لهون وبس , اليوم صرت تسمع بنت صفك , تسب على صاحبتها بنفس هاي المسبات !! نفس مسبات الي بسبوها الذكور بسبوها الاناث , عذرا سامحوني , مش اناث هذول , هذول ابعد ما يكونوا عن الانوثة , حتى لو كانوا ملكات جمال !! تخيل انا شب قاعد بالصف وبسمع بنت صفي تقول لصاحبتها … امك ؟ شو بدي اخذ عنها فكرة ؟ شو بدي اقول عن هاي البنت غير انها مش محترمة ووقحة واذا بدي اعصب كمان بقول بنت الهيك والهيك …. ( بس هاي براسي ما حدا بسمعها ) , يعني لو ينتهوا البنات من الدنيا ما بقبلها تكون مرتي .

خلاصة كلامي بخصوص هالموضوع انو الي بحاول يرد الاعتبار لنفسو عن طريق شتم العرض الام او الاخت , بكون انسان ضعيف جدا , وبتكون شخصيتو مهزوزة , مش معنا كلامي يسب مسبات ثانية لا لا , القوي هو الي بوخذ حقو بشطارتو وذكا , واذا تعذر بأيدو وقتو البدنية , اما مبدأ الشتم هاض لضعاف النفوس .

4- المدرسة صارت سوق سودا , وما حدا يقول ببالغ بكلامي , لانو السوق السودا بنباع فيها الاشياء المحظورة , وبالنسبة لمجتمعنا العربي المحافظ بشكل عام , في كثير شغلات ممنوع التداول فيها بين الناس بشكل عام وبين الشباب خصوصا , من هاي الشغلات الدخان , ولو وقف الشي على حد التداول بكون مقبول , اما المدرسة صارت وكر للشباب المحرومين من التدخين قدام اهلهن , بتلاقي الشب كل يوم قبال ابو , وابو كل يوم بخلص علبتين دخان قدام ابنو , واذا صار الولد بدو يدخن بجي الابو بحرق وتيح الي خلف ابنو ( يعني بحرق وتيح حالو وهو مش عارف ) , طيب ليش يا عمي انت اشكرا بتدخن قدام ابنك وما بدك هو يدخن ؟ مهو الولد بعمل شو بعمل ابو قدامو !! المهم هاض الشب وين بلاقي احسن محل يدخن فيو ؟ اكيد المدرسة ؟ ليش في غيرها محل حلو ومناسب للتدخين وللتصبب عالبنات ولقلة الحيا ؟ اكيد ما في , مع انو الاصل ما تكون هيك المدرسة , بس شو نعمل لازم نواكب التطور ؟ لانو الحنا بسنة 2009 , والادب والحشمة والاحترام والمباديء والاخلاق كلها صارت موضة قديمة !! مزبوط كلامي ؟

طبعا غير الدخان في عندكو الافلام الجنسية , ولاد الصف بتبادلوا الفلم قدام بنات صفهن عادي جدا , والي بسأل بحكولوا هاي لعبة Fifa 2009 , ويا ويلو الاستاز اذا حب يفحص الدسك او يفحص الشنتة , بنسير بدنا نتشكى علي ونخرب بيتو , بس اجدد موضة بمدارسنا غير عن الدخان والافلام , المخدرات يا جماعة الخير واخيرا وبعد طول انتظار وصلت لمدارسنا , ووصلت لولادنا , ووصلت لبيوتنا , وانا الابو مالني بأبني ؟ انا علي اروح زي الحمار من الساعة 5 على الشغل واروح على الاربعة واجيب كل اخر شهر مصاري , والباقي على مرتي , يعني ترباة الولاد وكل هالامور ما دخلني فيها !! يعني لبس بنتي ما دخلني فيو ؟ ولبس مرتي هي حرة فيو , يعني انا بس بالاخر شو طلعت ؟ حمار شغل .

5- العلمانية المطلقة في المدرسة ( العلمانية هي فصل الدين عن الحياة ) , بحيث انك كطالب ما بتشوف اي من المظاهر الدينية في المدرسة غير بثلاث امور وهي انك تقعد بحصة الدين ويشرحلك الاستاز عن قضايا عامة بالدين , وطبعا مع عدم ذكر اشي اسمو الجهاد او الولاء والبراء او دفع الصائل لانها كلها امور بتشجع على الكراهية والحقد والارهاب !! وثاني شغلة انك بتشوف بنت صفك لابسة على راسها او مغطية كل جسمها وهاض شي ممتاز وحلو لكنو شي ظاهري وعام , يعني مش متأصل كفكر وكمبدأ وكمشروع حياة  وانما كتقليد وكعادة فقط, اما الشغلة الثالثة فهي بعض الاحتفالات ببعض الايام من السنة لما يكون ذكر المولد النبوي الشريف او على العيد .

خلال هاي المظاهر الثلاث بنشوف الاسلام بالمدرسة اما غير هيك فانت بتشوف مسلمين بس ما بتشوف إسلام , يعني لما بدو المدير يحكي للطلاب عن خطر التدخين بنادي متخصص او بنادي شيخ ومتخصص عشان يدعم الفكرة وهاض شي حلو , اما ينادي الشيخ يحكي للشباب والصبايا عن العفة والأدب والقيم والاخلاق ؟ هاض من سابع المستحيلات , حضرة جناب مدير مدرستنا مش معني تنتشر مظاهر الدين بالمدرسة بشكل كبير , لانو بخاف على منصبو , وخايف انو تنادي الحكومة وتسألوا شو بتعمل انت وشو بتخبص , ناسي انو اهل الدين نفسهن هني حطوا مدير للمدرسة !!

بتمنا تكونوا استمتعتوا بهالموضوع , والاهم انكوا تفهموا  وتعملوا , ما بحب يكون هيك موضوع بهيك اهمية كلام عابر , بنسمع من هون وبطير من هون , بالاخر انا مثلي مثلكوا , بحبكوا وبحب تكونوا الافضل دائما , وعشان هيك بحاول قدر المستطاع اوجه وانصح , بتمنالكوا حياة سعيدة , وهداة بال , ومستقبل مزهر ملان انجازات ومعالي , تكونوا مربين ومربيات اجيال حقيقين , ومحاربين لكل هاي المظاهر الي حكيت عنها بكل قوة .

باحترام  : اخوكم المحب EbNCaNa

مرحبا للجميع …

منطق القوة ما بنحصر فقط في استعمال العضلات وانما هناك ايضا منطق للقوة في المدرسة والتعلم وحتى في امتحان البجروت … انا ما بحكي هون عن القوي الي بدو يعربد على المراقب او المراقبة عشان يعرف يغش كيف بدو … انا بقصد عن منطق القوة في تسخير اسم المعلم وهيبتو لمصالح شخصية … لكن هالنوع من القوة هو خسيس ومش عادل … ايش يعني يجي المعلم يدخل ابنو على صف غير الصف الي ولاد صفو فيو … عشان يفوتلو حل لشي امتحان ؟؟ وين العدل ووين القيم الي بتعلمنا عليها يا استاذ ؟؟ بدك تسوجر ابنك بالجامعة ؟؟ طيب مأبنك فكش ومش عارف يدبر حالو … او بالاحرى لونك تتركوا لحالوا بدون ادخال حلول كان من اول بجتهد … بس انتي علمتو على قلة الخواص … قال بستحي المعلم انو ابنو يكون بصف ادبي … لا انا مستوى ابني لصف علمي ومرات بروحوا منهن وبدخلوا ولادهن لصف الفيزيا … يعمي ابن مستوى اعلى من البيولوجيا !!

انا بحكي هالحكي ومش بالضرورة انو بسير بمدرستي … انا بحكي بشكل عام بالوسط العربي … فش حدا احسن من حدا وكلمة الحق بقولها … بجي البجروت وبكون الولد او البنت مخططين مسبقا انو مش رح يدرسوا … لويش يعملوا هيك وهو الحل فايت ؟؟ ومرات في نماذج بجروت ما بمسكها الولد … بتنحل وبحط عليها ملصق اسمو وهو بكنش بالمدرسة اصلن وبتتسلم وبوخذ علامة عالية … واذا بكون المعلم او المدير عندو شوية حيا … قال بخلي ابنو يجي على المدرسة بس عشان يشوفوا انو اجا … عشان ما يعمل حولي علامات سؤال …

بس يجي المراقب الكبير ” البكّار ” … بفوت عند المدير … كيف حالك شو الاخبار … شو تشرب خيا ؟؟ والله اهلن وسهلا زارتنا البركة … بعد شوي بسير المدير يلمّح للمراقب انو بدو يفوت لابنو حل او على الاقل يزبطو بالامتحان … بقلو المراقب من عيوني واذا كان عندو نزاهة برفض بس بدون ما يوصل هالحكي لفوق …

انا ما بجمع وما بحط كل مدراء ومعلمين المدارس بخانة ” غير النزيهين ” لكن في نسبة كبيرة من هالنوع واذا استرجى شب او بنت يفتح ثموا بخسفوا بالعلامة الواقية “المجين ” يعني قمة المسخرة صارت بمدارسنا وبالاخر قال بدنا مساواة مع اليهود … اني مساواة واحنا بعدنا غشاشين وبنركن على النقل !!؟

انا ما بعمل حالي ملاك نازل … واذا اتيحت الي الفرصة اجيب حل من استاذ ما بقول لا بالمرة … اليوم صعب نحكي عن مثالايات …. يعني مش هويّن اقول والله انا برفض انو يجيلي مساعدة من استاذ لاني بدي اجيب العلامة بجدارتي … هالحكي يا حبيبي من زمان خلص تاريخو … لانو ما بسير انت تدرس تدرس بالاخر تجيب 75 وابن الاستاذ الفلاني ما بعرف عن شو المادة ويجيب 100 !! كيف بدك اعود اركن على حالي او اقرر اني ادرس بعد هالحكي كيف ؟؟ العالم كلو واسطات اليوم والشاطر يستغل الواسطات لكن بدون ما تخلي حالك عبد عند صاحب الواسطة … اذا بدوش للعمى واوعك تترجّى حدا … انزل اشتغل بالحجر وبالحم وخليك بكرامتك ولا تروح تترجى حدا عشان واسطة الا كانت واسطة بدون شروط … يعني واسطة عن عشم ومحبة .

مش حابب اطوّل بالحكي صراحة اني بعتقد انو الفكرة وصلت وبالنهاية نصيحة لكل واحد شايف انو فش عدل بمدرستو يروح يواجه المدير او يحاول يوقعو او يبعث مكتوب للوزارة … فش فيها ولشي بس طبعا مش تبعث مكتوب فاضي ملان … ابعث مكتوب مع مواد واثباتات دامغة علي صار قدامك مع ولاد المعلمين … ممكن قسم من الناس ” ابوي وابوك ” يقولولنا انضب يا احنا مش قدهن هذول الناس بعدين انتي مالك بابن الاستاذ يتشحر ويجيب مليون مش بس 100 المهم انت توخذ العلامة بجدارتك … اذا بحكيلكوا اهلكوا هيك ما تردوا بالمرة … لانو حكيهن مجرد ازالة حمل عن كتافهن لانهن بشعروا بالضعف وعدم القدرة على التحرك من اجلك … عشان هيك اعمل الي بتشوفوا مناسب عشان تنجح … اذا بدك انجح بالبجروت لويش بتخليني ادرس ؟؟ مش مهم بجروت كامل ؟ خلص بجيبوا وبعلامة ممتازة بس المهم ما تسألني كيف جبتو !!

سلامات

أيوا مثل ما شايفين … مش يوميات طالب بالمدرسة نفسها … انما بالساحة تبعت المدرسة والصراحة انها يوميات بترفع الراس واذا بدك تسأل ليش … بقلك ببساطة لانها يوميات بتسوّد الوجه وممنوع حدا يحكي فيها … بعرف انو مش حلو الواحد يحكي شو في بمدرستو عشان يحافظ على سمعتها … لكن كلمة الحق حق وانا بعتبر حالي مكلف اني احكيها بالرغم من مرارتها .

 المهم بلبس القميص والبوت وبحط كرت الباص بجيبتي عشني بكون حاطو تحت كتبي ( قال عشان ما يطّطعوج ويضل مبين جديد ) … بروح اغسل وجهي وكالعادة بيجي طرف القميص على المغسلة بتبلبل !! بروح اجيب محارم عشان انشف الميّ بعدين بروح ارش ريحة .. او عطر الي بدكوا يا سموا … وبضلني رايح … بخصوص الفطور ما بفطر هيك متعود لاني بس اصحى ما بكون الي نفس للاكل … حتى كبّاية شاي او بسكوته ما برغبها .

 بنزل على محطة الباص ( جنب الدار ) بستنى هناك بعد شوي بجو طارق واسلام ( صحاب ) … وكالعادة طارق بدور يخرّف عن المدرسة وشو ضل بجاريت وشو اجا بالامتحان الفلاني وانو خايف ما يزبط بالامتحان العلاني … يعني حكيو كلو تعليم ومدراس سمّة بدن بس ما بلومو لانو طارق شاطر ودايما بضل هكلان الهم يعني عندو مسؤولية مش مثل بعض جماعة P: … اما اسلام بدور يحكي على شوفير الباص لي تأخر او بسير يعلّق بالحكي عالطالع والنازل … يعني باختصار هواية اسلام ” التنصيف” او الحكي على الناس !!

بنطلع على الباص بس يجي … بطقلّنا طقة وبنفوت حاجزين النا محل اول كراسي القسم الورّاني من الباص وهناك بنقعد انا وطارق واسلام … ومرات سامر بجي بكير بطلع معنا كمان … بنبربر شوية حكي ومرات بفتحوا سيرة الفطبول والله مش عارف على شو بحبو !! المهم بنصل على المدرسة .

من عند بوابة المدرسة بتقدر تقول انك فتت على عالم ثاني مختلف تماما عن العالم براة المدرسة !! بدك تسئلني ليش ؟؟ الجواب صراحة مجبور اقسّمو لأكثر من قسم لانو القضية بتحيّر والحكي بتشعّب … خلينا نوخذ نقطة نقطة …

1- فقدان المدرسة لجوهرها الذي بتمثل بكونها مصنع اجيال … مصنع رجال ونساء المستقبل … الزوج صاحب المسؤولية والغيرة على عرضه والزوجة ذات الكيان الراقي الذي لا يقبل الغناء على اوتار الغرب الكافر … اسف لاني انجريت شوي للفصحى لكن ما بقدر اوصف هالامور بالعامية لانو اذا بدي احكيها بالعامية بتطلع الفاظ من غير المناسب اكتبها بالمدونة .

بتشوف الشب لابس بنطلون ساحل وبلوزة تسمود مع سنسال بالرقبة وداير سطلين ” جل / جلي ” على راسو وبقول يا ارض اشتدي ما عليكي قدّي !! خلينا نيجي لشغلة شغلة … يا سيدي انت شب وبتحب تظهر شبابك ممتاز ومش غلط اذا لبست بلوزة تسمود عشان تبين هالجسم الحلو مع انو احلا بتكون لما تعرف انو انتي الي بتعمل لبسك ومش لبسك بعملك وبعطيك قيمة … البنطلون خيّا لويش ساحل ؟؟ واذا بكنش ساحل بروح بسحّلو او ما بلبس ” كشاط ” او ” سبك ” كيف بقولوا اهلنا بالمثلث … يعني بالله انا ناقصني يا خيّا اشوف لباسك ؟؟ وشو بدك تستفيد لما تلبس هيك ومين بدّك تقلد ؟؟ بدّك تقنعني يعني انو انتي الي عملت هالموضة ومش جايبها من شي ممثل او شي شب ثاني انتي مفتون فيو ؟؟

يا حبيبي يا روحي … بنطلونك لو بكون مرفوع بكون احلا سدّقني وتأكد انو البنت مش رح تحّبك او تعجب فيك عشان  هالبنطلون الساحل انما بالعكس … البنت الواعية ما بتعملّك قيمة مثل ما لازم لكن للأسف اليوم اغلب بناتنا بحبوا هالحركات وبتيجي تقلك البنت ااا وشو يعني ؟؟ والله حلو هالبنطلون من وين اشتريتو !!؟ واذا بدها تعمل حالها كمان شوي حضارية بتقلك Cooool من وين جبتو ولك !؟؟ يعني بالله انو شب بدو يضل فيو حبّة عقل لما تقلو بنت صفو مثلا هيك … بدو يروح يلبس بنطلون مليح بكرا ولا بدو يجي مسّحل بنطلونو اكثر ؟؟

وصلنا لمرحلة لا نحسد عليها صراحة واذا وقف الشي على اللبس 1000 الحمد لله لكن الاشي بتعدى عن كونو مشكلة في اللباس لانو بالزمانات كان ابوي وابوك صاحب مسؤولية … كان يتجوز بكير عمرو 18 او 19 وكان يشتغل ويجيب مصاري ويربي عيلة … احنا اليوم الشب بعمل حالو قبضاي وبس يتجوز ويجي ولد ما بقرب علي وبعدين بهملوا … واذا بكى هالولد يعني عيّط ممكن يسير ابو يعيّط معو … ليش ؟؟ لانو لسا مش ناضج … مش مؤهل يكون والد ومفش مسؤولية لانو جيل اليوم ما عاد يتربى على السراحة بالغنم او يضل واقف كذا ساعة بحظيرة الغنم او ينزل كل يوم الصبح مع ابو على السهل يزرع ويعتني بالارض … اليوم الي صار يربينا الانترنت … وستار اكاديمي … والبلفون … وصار مثلنا الاعلى نور ومهنّد وانجلينا جولي وجوزها براد بت بدل ما يكون مثالنا الشيخ احمد ياسين او عبد العزيز الرنتيسي رحمهم الله !! صرنا نطرب على قصص الحب والغرام وقصص الفضايح بين الناس وقصص المغامرات العاطفية ( الجنسية بكثير من الاحيان ) بدل ما نطرب على قصص السلف الصالح وقصص انتصار المسلمين بالمعارك على الصليببين او قصص المجاهدين بغزة ولبنان وافغانستان … بتسئل اليوم الولد الصغير عن اي لاعب كرة قدم بقلك عن اسمو … بتسئلو شو صار باخر حلقة من سنوات الضياع او نور بقلك بالتفصيل … اما تسئلو مين اسامة بن لادن ؟؟ مين عبد الله عزام !!؟؟ بقلك هاض بأي مسلسل بيجي !!

2- عروض للأزياء المغرية في حرم المدرسة … وهون حدّث ولا حرج … بكفركنا وبغير كفركنا في هالشغل ويمكن كفركنا اهون من غيرها لكن هذا لا يعني رفع العتب عن الصبايا … بتكون لابسة جينز تسمود عالاخير وكل جسمها مفصّل وبتمشي زي عارضات الازياء بالساحة … واذا شب تطلّع عليها بتقلو اكسر عينك ( وهي من جوا مكيّفة ) واذا كان الشب وقح كمان شوي وسمّعها حكي … بتروح تنادي اخوها … وانت يا اخوها قبل ما تيجي بدك تهاوش وتعمل حالك كوم شرف .. روح ضب اختك الي لابسة هيك .. مش تعمل حالك كوم غيرة  … طيب يا خيتا انتي لويش لابسة هيك ؟؟   مش عشان يشوفك الشب ويستحليكي ؟؟ جوابك لا ؟؟ انا بقنعك انو مبلا … لما تكوني بالبيت شو بتلبسي ؟؟ ابصر كيف بكون لبسك وحالتك حالة صح ؟؟ ما تقولي لا … ليش لما تروحي على المدرسة بتتزبطي وكأنك رايحة على سهرة ؟؟ وليش بتلومي الشب عشنو سمّعك حكي او تفرج عليكي بنظرات مشبوهة ؟؟ مش الولد العاطل بجيب لأبو المسبة ؟؟ ولبسك الاعطل من عاطل بجيبلك اتخن مسبات … وحتى اليوم بتلاقي بنت على اخر موضة … ولابسة لبس مشلح تقريبا بس بتلاقي عندها حدود بتلاقي عندها ضوابط ؟؟ يعني هل بالضرورة كل بنت بتلبس هيك هي ( …. ) او ( … ) لا !!

المشكلة انو بنوخذ انطباع اولي عن طريق الشكل وهذا مش مزبوط … وكلامي ما ببرر ابدا انو البنت تلبس هيك بالعكس لازم البنت تلبس حسب تصرفتها ومعتقداتها ومش تتصرف حسب لبسها … في بنات بخبّصوا باللبس عن جهل وتقليد اعمى … وفي الي بلبس هيك عن ادراك كامل لطبيعة الشب وشو بحب وشو اكثر شي بغري وبداعب مشاعرو وغرائزو … هالنوع من البنات سم ومش عارف كيف بكرا الي من هالنوع بدها تتجوّز او يأمنها جوزها على بناتو وتربيتهن !!

 صراحة في كثير اسباب ثانية لكن انا بفضل اعرض هالاسباب على شكل حلقات ومواضيع منفصلة … وهاي بس كانت البداية .

شكرا على المتابعة …